İki ildir davam edən COVID pandemiyası amerikalılara problemlər və məyusluqlarla yanaşı, həm də bir aydınlıq gətirdi: pandemiya siyasətçilər arasında korrupsiya hallarını üzə çıxardı. Xüsusilə, Amerika mətbuatı Los-Anceles şəhər şurasının bir sıra üzvlərinin korrupsiya fəaliyyətləri ilə bağlı faktları təfərrüatlı şəkildə təsvir etdi. Amerika statistikasına görə, “mələklər şəhəri”nin parkları və küçələri hazırda 66 000 evsizin daimi gecələmə yeri olmuşdur və bu rəqəm hər gün artır.

Mitç O’Farrellın separatçı Beqlaryanla görüşü

Buna baxmayaraq, NewsBlaze nəşrinin yazdığına görə, son iki ildə korrupsiya və rüşvətxorluq ittihamı ilə üç ittiham aktı alan Los-Anceles şəhər şurası üzvləri siyasi dəstək üçün vaxt tapırlar. Kimi dəstəklədiklərini düşünürsünüz? Əlbəttə ki, Ermənistanı! Los-Anceles şəhər şurasının “erməni kursu”nun səbəbləri barədə yalnız təxmin yürütmək olar. Əgər bəzi şura üzvlərinin Ermənistana qarşı həssas münasibətini sosial şəbəkələrdə bir vaxtlar qonşu Azərbaycanın dörddə bir ərazisini işğal etmiş “kiçik dövlət”in ağır əzabları ilə bağlı isteriya ilə izah etsək belə, şəhər şurasında yəhudi deputatların mövqeyi tamamilə anlaşılmazdır: məlum olduğu kimi, İkinci Dünya Müharibəsi illərində bir çox erməni nasist rejimini dəstəkləmiş, erməni nasist tərəfdarları isə bu ölkədə hələ də milli qəhrəmanlar kimi tərənnüm olunur və onların şərəfinə abidələr ucaldılır, deyə nəşrin jurnalisti Nurit Qringer yazır. Bəlkə Los-Ancelesdəki erməni diasporunun nümayəndələri, dünyada ən nüfuzlu diasporlardan biri hesab olunan bu icma, şura üzvlərindən bəziləri haqqında kompromatlara malikdir və onları şantaj edir? Yoxsa erməni lobbiçiləri şura üzvlərinin qohumlarının əlaqəli olduğu şirkətlərin bank hesablarını doldurur? deyə jurnalist sual verir. 1 noyabr 2021-ci ildə Los-Anceles şəhər şurasının 13-cü dairədən olan üzvü Mitç O’Farrell fəxrlə belə bir tvit paylaşmışdır: “artsax respublikasının dövlət naziri Artaş Beqlaryanı Los-Anceles meriyasında qarşılamaq mənim üçün şərəf idi”. (“artsax” – ermənilərin Azərbaycana məxsus Qarabağı adlandırmaq üçün istifadə etdiyi toponimdir, bu ərazi 30 il ərzində erməni işğalı altında olmuşdur. Ermənilərin uydurduğu “artsax” beynəlxalq ictimaiyyət tərəfindən heç vaxt tanınmayıb, çünki bu ərazi beynəlxalq səviyyədə Azərbaycan Respublikasının ayrılmaz hissəsi kimi qəbul edilir, deyə Amerika nəşri izah edir.) Qringer daha sonra qeyd edir ki, ABŞ bayrağının dalğalandığı bir müəssisədə mövcud olmayan bir dövlətin “nazirini” qəbul edərək, O’Farrell öz ölkəsini gülünc vəziyyətə salmışdır, çünki ABŞ Dövlət Departamentinin rəsmi bəyanatına əsasən, “…Birləşmiş Ştatlar artsaxı suveren dövlət kimi tanımır və Qarabağ regionunu Azərbaycan Respublikasının tərkibində hesab edir”. O’Farrellın Türkiyə və Azərbaycanın guya ireal “artsax”a qarşı təcavüzü ilə bağlı sözləri də eyni dərəcədə açıq-aşkar yalandır. Təcavüzkar Ermənistan olmuşdur, o, Azərbaycan ərazilərini işğal etmiş və 1988-1994-cü illərdə dinc Azərbaycan əhalisinə qarşı kütləvi qətllər törətmişdir. Türkiyə isə, İsrail kimi, Azərbaycanın müttəfiqi idi və ona yalnız siyasi dəstək göstərmişdir, deyə jurnalist göstərir. O’Farrell yazır: “Kiçik Ermənistanın (yəni Los-Ancelesin – red.) nümayəndəsi kimi mən bütün dünyada, o cümlədən artsax xalqı ilə birlikdə olan ermənilərlə həmrəyəm və bacardığımız hər şeylə kömək etməyə söz verirəm”. Artaş Beqlaryanla birgə çəkilmiş şəkillərə və mövcud olmayan “artsax”a kömək etmək barədə verdiyi təntənəli vədlərə baxanda, cənab O’Farrellın tarix məsələlərində, yumşaq desək, zəif olduğu anlaşılır. Yoxsa hər şey bu qədər sadə deyil? Və əgər “artsax” adlı bir şey təbiətdə mövcud deyilsə, bəs Los-Anceles şəhər şurasının üzvləri kimin üçün yardım toplamağa çalışır? Yenə də korrupsiya sxemi? Yoxsa böyük siyasət? O’Farrellın erməni “naziri” ilə şübhəli görüşünə Los-Anceles şəhər şurasının digər üzvləri – 5-ci dairəni təmsil edən Pol Korets, 14-cü dairəni təmsil edən Kevin de Leon və 4-cü dairəni təmsil edən Nitya Raman da qoşulmuşdur. Görüşün təşkilatçısı isə Los-Anceles şəhər şurasının üzvü və “Daşnaktsutyun” partiyasının fəal tərəfdarı Pol Krekoryan olmuşdur. Krekoryanın erməni millətçiləri partiyasına münasibəti, ola bilsin, vəziyyəti anlamaq üçün açardır, deyə nəşr izah edir. “Daşnaktsutyun” partiyası ötən əsrdə yaradılmış, hazırda Livan, İran və böyük erməni diasporunun olduğu digər ölkələrdə fəaliyyət göstərir. İkinci Dünya Müharibəsi zamanı daşnaklar Hitler və Holokostu dəstəkləmiş, müharibə illərində nasistlərin əməkdaşları olan “Daşnaktsutyun” liderləri bu gün həm Ermənistanda, həm də Los-Ancelesdə milli qəhrəmanlar kimi tərənnüm olunur. Bundan başqa, onlarla günahsız dinc sakinlərin qanına səbəb olan erməni terror təşkilatı JCAG (Erməni Soyqırımı Ədaləti) ABŞ ərazisində fəal şəkildə fəaliyyət göstərir. Onun əsas lobbi aləti ABŞ senatorlarının, konqresmenlərinin, Kaliforniya ştatı qanunvericilərinin və Los-Anceles şəhər şurasının üzvlərinin seçki kampaniyalarını maliyyələşdirən Amerika Erməni Milli Komitəsidir (ANCA), deyə nəşr xatırladır. “artsax naziri” üçün Kaliforniyanın Qlendeyl şəhərindəki Ermənistan konsulluğunda xüsusi təşkil olunmuş qəbulda qonaqlar arasında Kaliforniya senatının nümayəndələri, Demokrat Partiyasından olan senator Entoni C. Portantino və Demokratik Partiyanın Milli Komitəsinin keçmiş sədr müavini Mariya Elena Durazo da olmuşdur. Los-Ancelesdəki Azərbaycan Baş Konsulu Nasimi Ağayev Beqlaryanla görüşən Kaliforniya rəsmilərindən Twitter hesabında soruşmuşdur: “Ermənistanın dünya ictimaiyyəti tərəfindən pislənilən cinayətlərini müzakirə etdinizmi? Yoxsa Los-Anceles ermənilərinin seçki kampaniyanıza dəstəyi görüşün əsas mövzusu idi?” Baş Konsulun sözlərinə görə, Kaliforniya ştatının vətəndaşları Qarabağ uğrunda iki müharibənin tarixi səbəblərindən, eləcə də şəhər və ştatlarında erməni lobbisinin təxribat xarakterli fəaliyyətindən yaxşı xəbərdardırlar. Onlar Los-Anceles şəhər şurasında seçilmiş nümayəndələrinin saxta “artsax naziri” ilə əlaqələrini, eləcə də Ermənistanın işğal siyasətini pisləməlidirlər. Bu siyasətə Azərbaycanın Qarabağı azad etmək uğrunda apardığı müharibə son qoydu.

HAQQIN.AZ